Kun parteċipant attiv fit-tfassil tal-politiki Ewropej u aqsam il-fehmiet tiegħek magħna. Esplora hawn taħt il-modi kif tista’ tikkontribwixxi għall-ħsieb li jikkonċerna l-politiki tagħna u l-modi kif naħdmu.
Għidilna x’inhu importanti għalik!
Semma’ leħnek dwar il-politiki futuri tal-UE u dwar is-simplifikazzjoni tal-liġijiet eżistenti.
Ipproponi jew appoġġja ideat għal regoli ġodda tal-UE.
Ingħaqad fid-dibattitu u involvi ruħek maċ-ċittadini dwar kwistjonijiet li jaffettwawna lkoll.
Fiċ-ċentru tal-attenzjoni: Il-baġit fit-tul tal-UE, li jmiss, infassluh flimkien
Fl-2025, il-Kummissjoni se tressaq proposti għall-baġit fit-tul tal-UE ta’ wara l-2027 u għall-ġenerazzjoni li jmiss ta’ programmi finanzjarji.
Kif imħabbar fil-Linji Gwida Politiċi tal-President von der Leyen, il-Kummissjoni taħdem għal baġit tal-UE ffukat, aktar sempliċi, li jħalli impatt akbar u li jirrifletti l-prijoritajiet strateġiċi Ewropej, bl-ambizzjoni li tkun Kummissjoni ta’ investiment.
Il-baġit tal-UE jgawdu minnu l-Ewropej kollha, u għandu jkollhom l-opportunità li jesprimu l-opinjonijiet tagħhom dwar il-futur. Huwa għalhekk li l-Kummissjoni qed tniedi seba’ konsultazzjonijiet pubbliċi u qed tistieden lill-partijiet ikkonċernati u liċ-ċittadini biex isemmgħu leħinhom dwar il-baġit futur tal-UE u l-politiki li għandu jsostni. Il-konsultazzjonijiet se jkun miftuħa sas-7 ta’ Mejju 2025.
Aqra aktar
Il-Konsultazzjonijiet Pubbliċi u l-feedback (li qabel kienu jissejħu “Semma’ Leħnek”) huma portal uniku għaċ-ċittadini u għall-partijiet ikkonċernati biex jagħtu l-fehmiet tagħhom dwar l-inizjattivi tal-Kummissjoni u jikkontribwixxu għall-proċess tat-teħid tad-deċiżjonijiet. Il-Kummissjoni hi impenjata li tisma’ l-fehmiet taċ-ċittadini u tal-partijiet ikkonċernati dwar il-liġijiet u l-politiki tal-UE kemm meta dawn ikunu qed jitħejjew kif ukoll jiġu implimentati. Il-konsultazzjoni pubblika dwar il-Protezzjoni tat-tfal – l-integrazzjoni tas-sistemi jew il-feedback rigward ir-regoli tal-UE dwar id-drittijiet tal-vittmi kienu eżempji għal kontributi bħal dawn fil-proċess tat-teħid tad-deċiżjonijiet.
Bl-użu tal-Inizjattiva taċ-Ċittadini Ewropej, iċ-ċittadini tal-UE jistgħu jitolbu lill-Kummissjoni Ewropea tipproponi leġiżlazzjoni dwar suġġetti fil-kompetenzi tagħha. Inizjattiva jeħtieġ li tiġbor mill-anqas miljun firma valida. Mill-introduzzjoni tagħha fl-2012, tnedew aktar minn 100 inizjattiva u madwar 18-il miljun ċittadin tal-UE appoġġjaw inizjattiva. L-inizjattivi ta’ suċċess influwenzaw il-proposti leġiżlattivi tal-Kummissjoni dwar kwistjonijiet bħall-aċċess għall-ilma tax-xorb jew l-istabbiliment ta’ miri obbligatorji għat-tnaqqis tal-użu tal-pestiċidi kimiċi.
Il-Pjattaforma tal-Involviment taċ-Ċittadini sservi bħala spazju ddedikat għaċ-ċittadini biex jinvolvu ruħhom f’diskussjonijiet fil-livell Ewropew dwar proposti importanti li jmiss tal-UE li jaffettwawna lkoll. Min-naħa tal-Kummissjoni Ewropea, aħna ħerqanin li nitgħallmu dwar l-opinjonijiet taċ-ċittadini fi stadju bikri meta nfasslu inizjattivi ta’ politika ġodda. Aħna se nivvalutaw l-ideat u l-proposti mressqin, ir-reazzjonijiet minn ċittadini oħrajn, u nikkunsidraw din il-valutazzjoni meta nimxu ’l quddiem bil-formulazzjoni tal-inizjattivi ta’ politika tagħna.
Il-Pjattaforma tal-UE għall-Parteċipazzjoni tat-Tfal
Il-pjattaforma tal-UE għall-Parteċipazzjoni tat-Tfal hija spazju għal djalogu mal-iżgħar ċittadini tal-UE biex isemmgħu leħinhom fit-tfassil tal-politika fil-livell tal-UE. Dan twaqqaf mill-Kummissjoni Ewropea f’kooperazzjoni mal-Parlament Ewropew u l-organizzazzjonijiet tas-soċjetà ċivili.
It-tfal kollha tal-UE jistgħu jipparteċipaw f’konsultazzjonijiet online, u ladarba jsiru membri, anke f’intervisti, gruppi fokus, laqgħat online u offline. Huma għandhom ukoll vuċi dwar id-direzzjoni u l-implimentazzjoni tal-attivitajiet tal-Pjattaforma, il-ħolqien konġunt tas-sit web u l-aspetti tal-komunikazzjoni.
